Айыл чарба министрлиги жана Ош облусунун жетекчилери Курултайдагы кайрылууларды талкуулады
Ош облусунун Чоң-Алай, Алай, Араван жана Ноокат райондорунда III Элдик Курултайда көтөрүлгөн маселелердин аткарылышын талкуулоо боюнча Суу ресурстары, айыл чарба жана кайра иштетүү өнөр жайы министрлигинин жетекчилиги жергиликтүү бийлик өкүлдөрү менен видео жыйын өткөрдү. Бул тууралуу Айыл чарба министрлигинен билдиришти.
Жыйынды министрдин орун басары, Суу ресурстары кызматынын директору Алмаз Жээналиев жетектеп, ар бир райондун жетекчилерине курултайда айтылган маселелерди өз убагында жана сапаттуу аткаруу тапшырмасын берди.
Жалпы 53 кайрылуу келип түшкөн, алардын ичинен:
- 14 — таза ичүүчү сууга жеткирүү боюнча;
- 23 — ирригация маселесине байланыштуу;
- калган суроолор кайра иштетүү өнөр жайын өнүктүрүү, чакан ишканаларды ачуу жана жайыт көйгөйлөрүнө байланыштуу болду.
Алмаз Жээналиев жыйындын жыйынтыгында жергиликтүү бийликти элдин ишенимин актай турган иштерди натыйжалуу бүтүрүүгө чакырды.
