Улуттук санарип экотутум жөнүндө жобо бекитилди
Министрлер Кабинетинин Төрагасы Адылбек Касымалиев Улуттук санарип экотутум жөнүндө жобону бекиткен тиешелүү чечимге кол койду.
Документ Кыргыз Республикасынын Санарип кодексин ишке ашыруу максатында иштелип чыгып, мамлекеттик органдар, жергиликтүү өз алдынча башкаруу органдары, юридикалык жана жеке жактар ортосунда санариптик маалымат алмашууну камсыздоого багытталган. Ошондой эле ал маалыматтардын негизинде санариптик сервистерди түзүүгө шарт түзгөн бирдиктүү жалпы улуттук санариптик экотутумдун иштешинин укуктук негиздерин аныктайт.
Токтомго ылайык, Президенттин Иш башкармасына караштуу “Кызмат” мамлекеттик мекемеси Улуттук санарип экотутумдун алкагында күбөлөндүрүүчү борбор болуп аныкталды. Аталган мекеме катышуучулардын санарип ресурстарын “Түндүк” санариптик өз ара аракеттенүү системасына кошуу үчүн коопсуздук серверлеринин аутентификациялык сертификаттарын жана санарип кол тамганы текшерүү ачкычтарынын сертификаттарын берет.
Мындан тышкары, документ Улуттук экосистеманын субъекттерин (катышуучуларын), алардын укуктары менен милдеттерин, экосистеманын объекттерин, аларды Улуттук экосистеманын санариптик реестрине киргизүүнүн тартибин жана реестрди жүргүзүүнүн эрежелерин аныктайт.
Жобо ошондой эле “Түндүк” системасы аркылуу катышуучулардын санариптик өз ара аракеттенүүсүнүн эрежелерин, мамлекеттик кызмат көрсөтүү Фабрикасынын иштөө принциптерин жана архитектурасын, ошондой эле катышуучулар ортосундагы талаштарды жана мамлекеттик кызмат көрсөтүүлөрдүн колдонуучуларынын даттанууларын кароонун тартибин камтыйт.
Бул чечим өлкөдө санариптик башкарууну өнүктүрүүгө, мамлекеттик кызматтарды көрсөтүүнүн натыйжалуулугун жогорулатууга жана маалымат алмашуунун бирдиктүү санариптик инфраструктурасын түзүүгө багытталган.
