Айыл чарба министрлиги: Азык-түлүк базарында баалар туруктуу
Суу ресурстары, айыл чарба жана кайра иштетүү өнөр жайы министрлиги азык-түлүк рыногундагы абал туруктуу экенин маалымдайт. Баа басымдарынын негизги себеби — дүйнөлүк рыноктогу энергия ресурстарынын жана азык-түлүктүн бааларынын өзгөрмөлүүлүгү, логистикалык көйгөйлөр жана глобалдык белгисиздик өңдүү тышкы факторлор менен байланыштуу.
Социалдык маанидеги негизги азыктар — ун, нан, сүт, күрүч, кант, макарон жана жумуртка — боюнча жыл башынан бери баа өсүшү катталган эмес. Өсүмдүк майынын кымбатташы импорттук чийки заттын баасына байланыштуу, бирок запастар жетиштүү болгондуктан тартыштык күтүлбөйт. Эт (уй жана кой эти) боюнча дүйнөлүк баа тенденциясы ички рынокко да таасир этүүдө, бирок кабыл алынган чаралардын эсебинен өсүү темпи көзөмөлдө турат.
Министрлик эт экспортун жөнгө салуу, май жана социалдык маанидеги товарлардын запасын камсыз кылуу, бааларга жума сайын мониторинг жүргүзүү жана өндүрүүчүлөрдү колдоо боюнча иш-чараларды жүргүзүүдө.
Ички өндүрүш негизги азык-түлүк түрлөрү боюнча өлкөнүн муктаждыгын жабууда. Бул өз кезегинде сырткы таасир болгондо да тартыштык тобокелин азайтып, азык-түлүк коопсуздугун камсыз кылууга өбөлгө түзөт.
