Казакстанда депутаттын эки аял алуу сунушу, кызуу талкуу жаратты
Казакстанда экинчи жубай алууга мыйзам түрүндө уруксат берүү сунушун билдирген депутат Абзал Куспановдун сунушу акыркы кездерде социалдык тармактарда кызуу талкуу жаратууда.
Анын баамында, мыйзам көп аял алууга тыюу салганы менен, көпчүлүк эркектер, анын басымдуу бөлүгү диндеги адамдар - бир нече аял менен жашап жатышат.
“Эгер юридикалык жактан карасак, де-юре - бизде көп аял алуу мыйзамга каршы экенин билебиз. Формалдуу түрдө бул мыйзамсыз, бирок жоопкерчилик каралган эмес. Ал эми де-факто - көптөгөн эркектердин, жөнөкөй жарандардын да, аткаминерлердин да экинчи, үчүнчү, кээде төртүнчү аялдары бар”- деп депутат Уральская неделя басылмасына билдирген.
Анын мындай сунушу жергиликтүү калктын макул жана каршы келген пикири менен гана чектелген жок. Белгилүү казакстандык продюсер жана актриса Баян Алагузова депутаттын бул сунушуна толуктоо иретинде - көп күйөөгө чыгууну да мыйзамдаштырып салуу пикирин билдирген.
