Ошто мыйзамсыз аңчылык кылгандарга айып пул салынды
Кечээ, 6-ноябрда Ошто Жаратылыш ресурстары, экология жана техникалык көзөмөл министрлигине караштуу инспекторлор жана “Барс” тобунун кызматкерлери рейд жүргүзүштү.
Ноокат районунун Чили-Сай участкасында аң уулоо эрежелерин бузган төрт жаран кармалып, ар бирине 12 500 сомдон 50 000 сомго чейин айып пул салынды. Мыйзамсыз атылган 8 кекилик үчүн 16 000 сом өлчөмүндө доо коюлду.
Ошондой эле Сүрөттүү-Таш участкасында белгиленбеген жерге таштандыларды таштап, өрттөгөн жаранга 7 500 сом айып пул салынды.
Рейддин максаты — жапайы жаратылышты коргоо, аң уулоо эрежелерин сактоо жана айлана-чөйрөгө келтирилген зыянды алдын алуу.
