ЖК депутаттыгына талапкерлерден жалпы 147 млн 50 миң сом күрөө чогулду
Борбордук шайлоо комиссиясынын мүчөсү Узарбек Жылкыбаев бүгүн "Биринчи радионун" эфиринде Жогорку Кеңештин депутаттыгына канча талапкер шайлоо күрөөсүн төккөндүгүн айтып берди.
Анын маалыматына караганда, күрөөнү 507 талапкер төккөн, жалпы сумма 147 млн 50 миң сомду түздү.
Эске салсак, буга чейин КРнын Салык кызматы талапкерлердин же саясий партиялардын шайлоо фонддорунан ишенимдүү адамдардын, байкоочулардын, өкүлдөрдүн милдеттерин жана үгүттүк кызматтарды аткаруу үчүн физикалык жактар алган акчадан киреше салыгы алынбай турганын кабарлаган.
Ошондой эле шайлоо кампаниясынын убагындагы үгүтчүлөрдүн иши салык алынуучу ишмердүүлүк түрүнө киргизилген эмес.
Мындан сырткары, “Мамлекеттик социалдык камсыздандыруу тарифтери жөнүндө” мыйзамына ылайык үгүттөөчүлөрдүн, байкоочулардын, ишенимдүү адамдардын кирешелери, сый акылары мамлекеттик социалдык камсыздандыруу боюнча камсыздандыруу взносторунан бошотулган.
