Бишкектеги спорт арена капиталдык оңдоодон кийин кайра эшигин ачты
Бишкек шаарында капиталдык реконструкциядан кийин заманбап форматта жаңыртылган спорт аренасынын салтанаттуу ачылышы болуп өттү. Иш-чарага Президент Садыр Жапаров катышып, аренага «Жаштык арена» деген жаңы ат берүүнү сунуштады. Анын айтымында, бул аталыш жаштык, энергия жана өнүгүүгө умтулуу духун чагылдырат. Бул тууралуу шаардык муниципалитеттен билдиришти.
Мурунку Дөлөн Өмүрзаков атындагы арена толук реконструкцияланып, 5 000 көрүүчүгө ылайыкталган заманбап спорт комплекске айланды. Имараттын жалпы аянты 15 342 чарчы метр болуп, үч кабаттан жана жер төлөдөн турат. Ичинде машыгуу залдары, медициналык бөлмө, фуд-корт, VIP-зал жана автоунаа токтотуучу жай бар.
Ачылыш аземинде Президент Садыр Жапаров футбол тобуна кол коюп, аны келечек муундарга символдук белек катары тапшырды. Өлкө башчысы Бишкек шаарынын мэри Айбек Джунушалиев менен биргеликте аренадагы шарттар менен таанышты.
Иш-чаранын алкагында “Кыялымдагы Кыргызстан” улуттук жаштар форуму өтүп, жаштар өлкөнүн өнүгүүсүнө багытталган идеяларын сунушташып, мамлекеттин келечегине салым кошууга даяр экендиктерин билдиришти.
