Эмгек жана иш менен камсыздоо тармагында кыргыз-британ кызматташуусу кеңейет
Эмгек, социалдык камсыздоо жана миграция министрлигинде министр Канат Сагынбаев Улуу Британия жана Түндүк Ирландия Бириккен Королдугунун Кыргызстандагы Атайын жана Ыйгарым укуктуу Элчиси Николас Боулер менен жолугушту. Бул тууралуу министрликтин басма сөз кызматынан билдиришти.
Жолугушуунун жүрүшүндө тараптар эмгек, иш менен камсыз кылууга көмөктөшүү жана эл аралык эмгек мобилдүүлүгү тармагындагы эки тараптуу кызматташуунун учурдагы абалын жана келечегин талкуулашты. Министр К. Сагынбаев кесиптик байланыштарды өнүктүрүү жана өз ара аракеттенүүнүн жаңы формаларын киргизүүнүн маанилүүлүгүн белгиледи.
Элчи Н. Боулер британ тарап мындан аркы конструктивдүү диалогго даяр экенин маалымдады. Жыйынтыгында тараптар кызматташууну улантуу жана өнөктөштүк мамилелерди мындан ары чыңдоо ниеттерин тастыкташты.
