Halal Expo 2025: Кыргызстандын адал индустриясы эл аралык деңгээлде өнүгөт

26-29-ноябрь күндөрү Стамбул шаарында өткөн Halal Expo 2025 көргөзмөсүнө жана 11-Дүйнөлүк Халал саммитине Кыргыз Республикасынын Экономика жана коммерция министрлигине караштуу "Адал-индустриясын өнүктүрүү боюнча борбор" жана бир катар ата мекендик компаниялар катышты. Бул тууралуу Экономика жана коммерция министрлигинен билдиришти.

Иш-чара Ислам Кызматташтык Уюму, SMIIC жана ICDT уюмдарынын колдоосу менен уюштурулуп, адал продукцияларынын дүйнөлүк соодасы үчүн ири платформа болуп кызмат кылды. Көргөзмөдө Кыргызстан колбаса, бал, кургатылган жемиштер, улуттук суусундуктар жана башка продукцияларын сунуштады.

Иш-чаранын алкагында борбордун директору Алмаз Кайырбеков SMIIC, TSE жана Түркиянын Адал аккредитациялоо агенттигинин жетекчилери менен жолугушуп, адал стандарттарын Кыргызстанда өркүндөтүү, адистерди окутуу жана аккредитация жаатында кызматташууну талкуулады. Ошондой эле Татарстан жана Малайзиянын өкүлдөрү менен да бизнес байланыштарды чыңдоого багытталган жолугушуулар болду.

Түркиянын Бажы жана соода министри Өмер Болат Кыргызстан стендине келип, ата мекендик продукциянын сапатын жогору деп баалады.