11 айда фитосанитардык талаптарды бузган 562,5 тонна жүк артка кайтарылган
Өсүмдүктөрдү химиялаштыруу, коргоо жана карантин департаментинин маалыматына ылайык, 2025-жылдын январь–ноябрь айларынын жыйынтыгы менен фитосанитардык талаптарга жооп бербеген 562,5 тонна жүк өлкөгө киргизилбей артка кайтарылды. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Аткарылган көзөмөл чараларынын негизинде жалпы 35 учур катталып, алардын курамына:
• 562,5 тонна ар кандай жүктөр,
• 70 515 даана көчөт,
• 11 387 даана гүл,
• 136 м³ пиломатериал кирген.
Фитосанитардык талаптарды бузган карантиндик жүктөргө карата мыйзамга ылайык кайтаруу, жок кылуу жана зыянсыздандыруу сыяктуу чаралар көрүлдү.
Ошондой эле аталган фактылар боюнча Кытай жана Нидерланды мамлекеттерине дипломатиялык каналдар аркылуу расмий нота жөнөтүлгөн.
Департамент белгилегендей, фитосанитардык көзөмөл — өлкөнүн аймагына зыяндуу организмдердин кирүүсүн алдын алуу жана өсүмдүк чарбасын коргоо боюнча маанилүү механизм. Бул иштер өсүмдүк чарба рыногунун коопсуздугун камсыздоого, ошондой эле өлкөнүн экспорттук потенциалын сактоого жардам берет.
