Бишкек, Ош шаарларындагы курулуш объектилерине рейд жүрүүдө
Курулуш, архитектура жана турак жай-коммуналдык чарба министрлигине караштуу Мамлекеттик архитектура-курулуш контролдоо департаментинин Бишкек жана Ош шаарларындагы башкармалыктары атайын техникалардын дөңгөлөктөрүн жуучу жайлардын иштөөсүн текшерүү боюнча рейд жүргүзүүдө. Бул тууралуу министрликтин маалымат кызматынан билдиришти.
Министр Нурдан Орунтаевдин тапшырмасы боюнча инспекторлор курулуш объектилерин төмөнкү талаптар боюнча карап чыгууда:
- атайын техникалар үчүн дөңгөлөк жуу пункттарынын болушу жана алардын иштөө абалы;
- демонтаж жана жер казуу иштеринде чаңдын пайда болушун алдын алуу максатында нымдоо чараларынын көрүлүшү;
- СН КР 12-02:2018 “Курулуш өндүрүшүн уюштуруу” ченемдеринин сакталышы.
Бишкек жана Ош шаарларындагы курулуш уюмдары жогорудагы талаптарды так аткарууга, экологиялык жана санитардык коопсуздукту камсыздоого чакырылат.
Текшерүүлөрдүн негизги максаты – шаардагы экологиялык абалды жакшыртуу, жолдордун булгануусун алдын алуу жана курулуш учурунда санитардык талаптардын сакталышын камсыздоо.
