Финкөзөмөл мыйзамсыз лотерея тараткан платформалардын тизмесин жарыялады

Экономика жана коммерция министрлигине караштуу Финансы рыногун жөнгө салуу жана көзөмөлдөө кызматы (Финкөзөмөл) интернет тармагында тараган мыйзамсыз лотереялык схемаларды аныктоо жана бөгөт коюу иштерин улантууда.

Финкөзөмөлдүн маалыматына караганда, мыйзамсыз лотереялар “оюн” деген ат менен жамынып, автоунаа, акчалай каражат жана башка баалуу сыйлыктарды убада кылуу аркылуу жарандарды алдоого аракет кылышат. Бул мыйзам бузуу менен катар, адамдардын финансылык коопсуздугуна да коркунуч жаратат.

Финкөзөмөл мониторинг жүргүзүү учурунда төмөнкү интернет-платформалар мыйзамсыз лотереяларды таратып жатканын аныктады:

“Dasmia” фитнес-клубу
“Бишкек Парк” соода борбору
“Миллион ТВ” YouTube каналы
“Тулпар ТВ” YouTube каналы
“Аселден Белек” YouTube каналы
“Мээрим ТВ” YouTube каналы

Мыйзамсыз лотереялардын негизги белгилери — уруксаттын жоктугу, акча которууну талап кылуу, расмий эрежелердин болбошу жана негизсиз ири байгелерди убада кылуу. Финкөзөмөл жарандарды шектүү онлайн-лотереяларга жеке маалыматтарын же акча каражаттарын бербөөгө чакырат.

Шектүү учурлар байкалганда Финкөзөмөлгө же укук коргоо органдарына дароо билдирүү сунушталат. Лотереянын мыйзамдуу экенин текшерүү, расмий тизмелерден карап чыгуу жана өтө пайдалуу көрүнгөн сунуштардан алыс болуу да коопсуздукту камсыз кылат.

Финкөзөмөл мыйзамсыз схемаларга катышуу да жоопкерчиликке алып келерин эскертет.

Байланыш:
Тел.: 96‑13‑04, 66‑45‑13
E-mail: fsa@fsa.gov.kg
Сайт: www.fsa.gov.kg