"Кепилдик фонду" ишкерлер үчүн 2 жаңы лизингдик продукт сунуштады
"Кепилдик фонду" ААКсы өлкө боюнча ишкерликти колдоо жана каржылоого жеткиликтүүлүктү кеңейтүү максатында жаңы кепилдик продукттарын ишке киргизди. Бул тууралуу фонддун маалымат кызматынан билдиришти.
Лизингдик инструменттерди өнүктүрүү алкагында айыл чарба жана атайын техника парктарын жаңылоону жеңилдетүүгө багытталган "Ижара" жана "Ижара плюс" аттуу эки жаңы продукт сунушталып жатат.
Фонддун маалыматына караганда, лизинг бүгүнкү күндө өндүрүштү модернизациялоонун натыйжалуу механизми болуп саналат. Бирок көптөгөн ишкерлер үчүн алдын ала төлөмдүн зарылдыгы чоң тоскоолдуктарды жаратып келет. Жаңы продукттар дал ушул маселени чечүүгө багытталган:
"Ижара" — лизинг предметинин баасынын 20% чейин кепилдик берет;
"Ижара плюс" — лизинг боюнча алдын ала төлөмдүн 30% чейин жапканга жардам берет.
Бул инструменттердин аркасында өз каражаты аз болгон ишкерлер да заманбап техника жана жабдууларды лизинг аркылуу алуу мүмкүнчүлүгүнө ээ болушат.
Кошумча маалыматты 7500 кыска номери аркылуу же gf.kg сайты аркылуу алса болот.
