Баткенде 2030-жылга чейин 37 ири агроөнөр жай объектиси ачылат
Суу ресурстары, айыл чарба жана кайра иштетүү өнөр жайы министрлиги 2030-жылга чейин өлкөдө айыл чарба продукцияларын кайра иштетүү деңгээлин 25%га жеткирүүнү көздөп, республика боюнча 385 ишкана ачууну пландаштырууда.
Министрликтин маалыматына ылайык, Баткен облусунда жүргүзүлгөн талдоонун негизинде 8 соода-логистикалык борбор жана 29 кайра иштетүү ишканасын куруу мерчемделген. Бул ишканалар аймакта өндүрүлгөн айыл чарба продукцияларын сактоого, жоготууларды азайтууга жана кайра иштетүүнү күчөтүүгө багытталат. Алар жашылча-жемиш, мөмө-жемиш, жүзүм, эт, сүт, жүн жана күрүч өндүрүшүнө тиешелүү.
Лейлек районунда 2 соода-логистикалык борбор жана 6 ишкана, Баткен районунда 2 борбор жана 8 ишкана, Кадамжай районунда 4 борбор жана 15 кайра иштетүү ишканасы ачылышы күтүлүүдө. Долбоорлор аймактарды толук камтып, жаңы жумуш орундарын түзүп, агроөнөр жай комплексинин атаандаштыкка жөндөмдүүлүгүн жогорулатары белгиленүүдө.
Министрлик жана жергиликтүү бийлик бул иштерди биргеликте аткарып, аймактын агроөнөр жай потенциалын көтөрүүнү көздөйт. Ошондой эле министрлик ишкерлерди жана инвесторлорду кызматташтыкка чакырат.
Кошумча маалымат: 0708 320 820, 0990 559 083.
