Бишкекте абанын сапатын текшерүү иштери улантылууда
2-3-декабрында Бишкек шаарынын мэриясынын муниципалдык инспекциясы шаардагы мончо жана сауналарды текшерүүнү улантты. Инспекторлор 83 объектти кыдырып, тыюу салынган заттарды өрттөө фактыларын аныктоо жана алдын алуу иштерин жүргүзүштү. Бул тууралуу мэриядан билдиришти.
Текшерүүнүн жыйынтыгында 49 мончо менен сауна катуу отун — көмүр жана отун колдонуп жатканы аныкталды. Ал эми 8 объект газга же электр жылытууга өткөнү белгилүү болду, калган объекттер өз ишин токтоткон. Атап айтканда, Орозов көчөсүндөгү 134-үйдө жайгашкан жеке мончо майда көмүр колдонуп жатканы аныкталды, бул Бишкек шаарынын мэриясынын 2025-жылдын 9-октябрындагы №290 токтомун бузуу болуп эсептелет. Жеке мончонун ээсине КРнын Укук бузуулар жөнүндө кодексинин 434-беренесинин 1-бөлүгүнө ылайык протокол түзүлүп, түшүндүрүү иштери жүргүзүлдү.
Муниципалдык инспекция борбор калаанын тургундарын экологиялык эрежелерди сактоого чакырып, жылытуу үчүн майларды, таштандыларды жана уулуу заттарды колдонбоого, жалбырактарды жана тиричилик калдыктарын өрттөөдөн алыс болууга, ошондой эле мүмкүн болушунча газ менен жылытууну колдонуп, экологиялык таза күйүүчү майларга өтүүгө үндөдү.
Ошондой эле, Бишкек шаарынын көрктөндүрүү эрежелерине ылайык шаар аймагында тигүү өндүрүшүнүн калдыктарын, авто майларын, боёк материалдарын, пластмасса, каучук, желим буюмдарын жана резина буюмдарын өрттөө тыюу салынган.
Муниципалдык инспекция шаар тургундарын экологиялык жоопкерчиликке чакырып, абаны жана чөйрөнү коргоо иштерин күчөтүүнү улантууда.
