Мамлекеттик катчы Арслан Койчиев “Манас” эпосунун күнү менен куттуктады
КРнын Мамлекеттик катчысы Арслан Койчиев бүгүн, кыргызстандыктарды “Манас” эпосунун күнү менен куттуктады.
Мамлекет катчы өз сөзүндө - Улуу “Манас” эпосу улутубуздун руханий өзөгүн, чыныгы атуулдук милдетти, мекенчилдикти, ошондой эле эл биримдиги менен өлкөбүздүн бүтүндүгүн түшүндүрө тургандыгын белгиледи.
“Өз тарыхын сыйлаган элдин келечеги бекем, өз мурасын урматтаган элдин руху түбөлүк болот” деп айтылгандай, дүйнө элинде теңдеши жок “Манас” үчилтигинде кыргыз элинин тарых-таржымалы, көөнө маданияты, эл аралык мамилелер саясаты, басып өткөн даңазалуу жолу, жалпы адамзатка калтырган улуу мурастары түгөл камтылган. Байыртадан эле тапканын тең бөлүшкөн кыргыз эли улуу дастанын адамзаттык дөөлөт катары баалап, 1995-жылы Бириккен Улуттар Уюмунун чечими менен “Манас” эпосунун 1000 жылдыгын өткөрдү.”
Анын айтымында 2013-жылы “Манас”, “Семетей”, “Сейтек” үчилтигин ЮНЕСКОнун “Адамзат маданиятынын материалдык эмес маданий мурастарынын” тизмесине катталган.
“Окумуштуулардын изилдөөлөрү боюнча “Манас” эпосунда 500дөн ашуун жер-суунун аталыштары, миӊдеген адамдардын ысымдары, тамак-аштардын, курал-жарактардын, кийим-кечектердин, абаздык аспаптардын, эң негизгиси нечендеген улуттардын аттары да айтылат. Залкар жана чыгаан жомокчулар “Манасты” 28 түрдүү кыраат менен 3 ай бою тынбай айтып, түгөтө албагандыгы элибиздин эсинде бүгүнкү күнгө чейин сакталып келет. Көрсө, чоң жомокчунун эргүүсү ташкындап келгенде, окуяны уламдан-улам шөкөттөп, башка бир жагдайларды кошуп, кеңейтип кете берет тура. Мына, анын чыныгы баалуулук касиети.” – деп билдирди А.Койчиев.
