Он бир айда кургак чөп жана таштанды өрттөгөндөргө 2,9 млн сом айып салынды
Бишкек шаарынын мэриясынын Муниципалдык инспекциясы 2025-жылдын башынан бери экологиялык талаптардын аткарылышын көзөмөлдөө максатында чарба субъекттери жана жеке сектордун жашоочулары менен 204 рейддик иш-чара жүргүздү.
Муниципалитеттин маалыматына ылайык, 11 айдын ичинде өнөр жай ишканалары, мончолор, сауналар жана жеке турак үйлөрдү камтыган 650дөн ашуун объект текшерилди.
Кургак чөптү, тиричилик, курулуш жана тигүү өндүрүшүнүн калдыктарын өрттөө фактылары боюнча Кыргыз Республикасынын "Укук бузуулар жөнүндө" кодексинин 115-беренесинин 3-бөлүгүнө ылайык, 290 протокол түзүлүп, жалпысынан 2 903 500 сом айып пул салынды.
Райондор боюнча маалымат:
• Ленин району — 74 протокол, 772 000 сом;
• Октябрь району — 36 протокол, 456 000 сом;
• Свердлов району — 95 протокол, 852 000 сом;
• Биринчи Май району — 85 протокол, 823 500 сом.
Муниципалдык инспекция шаар тургундарына жана уюмдарга катуу тиричилик таштандыларын, кургак чөптү жана башка таштандыларды өрттөөгө тыюу салынарын эскертет.
Белгиленген эреже бузган учурда жеке жактар үчүн — 7 500 сом, юридикалык жактар үчүн — 23 000 сом өлчөмүндө айып пул каралган.
