Жер мыйзамдарын бузгандарга 8 млн 500 миң сомго чейин айып пул каралган
Суу ресурстары, айыл чарба жана кайра иштетүү өнөр жайы министрлигине караштуу Жерди жана сууну көзөмөлдөө кызматы жарандарды жерлерин багытына ылайык колдонууга эскертет.
Жер жана сууну көзөмөлдөө кызматы белгилегендей, айрым жарандар жерлерин багытына ылайык колдонбой, айрыкча айыл чарба багытындагы жерлердин кыртышын бузуп жатышат. Бул — Кыргыз Республикасынын Жер мыйзамдарын одоно бузуу болуп саналат.
Айыл чарба жерлерине кум-шагыл төгүү, мыйзамсыз курулуш салуу, жердин кыртышын бузуу сыяктуу аракеттер олуттуу жоопкерчиликке алып келет. Мыйзам бузулганда айып пулдар бузулган жердин аянтына жараша эсептелет:
- Жайыт жери: 1 гектар бузулган учурда чыгым болжол менен 930 000 сомго чейин;
- Кайрак жана сугат айдоо жери: 1 гектар бузулган учурда чыгым 8 500 000 сомго чейин болушу мүмкүн.
Мындан тышкары, бузулган жерди өз эсебинен баштапкы абалына келтирүү милдети жүктөлөт.
Жерди багытына ылайык колдонуу жана мыйзамдарды так сактоо калк үчүн туруктуу айыл чарба өнүгүүсүнө жана экологиялык туруктуулукка салым кошот, - деп айтылат маалыматта.
