Башкы прокуратура коррупцияны өлчөө боюнча Нью-Йорктогу конференцияга катышты
2-4-декабрда Кыргыз Республикасынын Башкы прокуратурасынын делегациясы Нью-Йорк шаарында өткөн Экинчи глобалдык антикоррупциялык конференцияга катышты. Делегацияны Башкы прокурордун орун басары Малик Бектурганов жетектеди.
Башкы прокуратура билдиргендей, иш-чарага дүйнөнүн 100дөн ашык өлкөсүнөн 450дөн ашуун мамлекеттик, эл аралык жана эксперттик өкүлдөр катышты. Конференциянын негизги максаты — коррупцияга баа берүү жана маалыматтарды натыйжалуу колдонуу аркылуу аны кыскартуу. Анын жыйынтыгында "Коррупцияны өлчөөнүн келечеги боюнча Нью-Йорк сунуштары" кабыл алынды.
Малик Бектурганов Кыргыз Республикасынын 2025–2030-жылдарга карата Коррупцияга каршы аракеттенүү стратегиясы, санариптик трансформация, активдерди кайтаруу механизмдери, акчаны адалдоого жана терроризмди каржылоого каршы чаралар жана антикоррупциялык ыйгарым укуктар институтун түзүүбоюнча жүргүзүлүп жаткан реформалар тууралуу маалымат берди.
Конференциядан кийин делегация Вашингтондо АКШнын Юстиция министрлиги, FBI, Каржы министрлиги, Мамлекеттик департамент жана БУУӨП/UNDP менен эки тараптуу жолугушууларды өткөрдү. Сүйлөшүүлөрдө эл аралык кызматташтыкты бекемдөө, маалымат алмашуу жана транс улуттук коррупцияга каршы аракеттенүү маселелери талкууланды.
Кыргыз Республикасынын Башкы прокуратурасы эл аралык антикоррупциялык кызматташтыкты өнүктүрүүгө жана глобалдык күн тартибин илгерилетүүгө багытталган туруктуу аракеттерин улантууда.
