"Тулпар Моторс" Кыргызстанда автоунаа өндүрүшүнүн негизин түзүүдө
Суу ресурстары, айыл чарба жана кайра иштетүү өнөр жайы министри Бакыт Төрөбаев Чүй облусунун Москва районуна болгон иш сапарынын алкагында кыргыз-өзбек биргелешкен “Тулпар Моторс” авто заводунун ишмердүүлүгү менен таанышты.
Айыл чарба министрлигинин маалыматына ылайык, заводдун расмий ачылышы 2024-жылдын 18-июлунда Президент Садыр Жапаров жана Өзбекстан Республикасынын Президенти Шавкат Мирзиёевдин онлайн катышуусунда өткөн.
Проект Кыргызстан Министрлер Кабинети менен Өзбекстан Өкмөтүнүн ортосунда түзүлгөн макулдашуунун негизинде ишке ашырылып, өлкөдө жеңил жана коммерциялык автоунааларды чыгарууга багытталган. Ишкананын өндүрүштүк кубаттуулугу учурда жылына 10 миң автоунааны түзүп, кийинки этаптарда 30 миң даанага чейин жеткирүү пландалууда.
Завод ишке кириши менен 1000ден ашуун жаңы жумуш орду түзүлдү. Ишкананын жалпы аянты 4,5 гектар, ал эми курулуш иштери 2023-жылдын май айында башталган.
“Тулпар Моторс” заводунда чыгарылган автоунааларды сатып алууну колдоо максатында “Жеңилдетилген автонасыя” программасы иштеп жатат. Автокредиттин шарттары төмөнкүдөй:
- Пайыздык чен: 8% жылына
- Баштапкы төлөм: 20%
- Кредит берүүчү банктар: “Элдик Банк” жана “Айыл Банк”
Жалпы инвестиция көлөмү 50 миллион АКШ долларын түзгөн долбоор үч этапта ишке ашырылып, өлкөнүн автомобилдерди өндүрүү тармагында жаңы баракты ачууда. “Тулпар Моторс” Кыргызстанда өнөр жай потенциалын жогорулатууда маанилүү роль ойнойт.
