Жаш ветеринарлар үчүн турак-жай жана карьера программасы старт алды
Суу ресурстары, айыл чарба жана кайра иштетүү өнөр жайы министрлиги жаш адистерди колдоого багытталган "Жаш ветеринар: турак-жай жана карьера" аттуу пилоттук программаны ишке киргизүү үчүн Министрлер Кабинетинин токтом долбоору дайындалып жатканын маалымдайт.
Программа ветеринардык кадрлардын жетишсиздигин азайтууга, алыскы жана айылдык аймактарда жаш адистерди кармап калууга, ошондой эле ветеринардык көзөмөлдүн сапатын жана натыйжалуулугун жогорулатууга багытталган.Токтомдун долбоору компетенттүү мамлекеттик органдардын алгачкы кароосунан өтүп, учурда тактоо жана толуктоо баскычында турат.
Пилоттук программанын алкагында 12 айдын ичинде 60 жаш адиске катышууга мүмкүнчүлүк берилет. Катышуучулар кеминде 5 жыл иштеп берүү боюнча милдеттенме алышат. Программа төмөнкүлөрдү камтыйт: көтөрүм акыларды берүү; ипотекага баштапкы төлөм чогултууга арналган атайын депозитке ай сайын каражат топтоо; батир ижарасын компенсациялоо же кызматтык турак-жай менен камсыз кылуу.
"Турак-жай + карьера" модели региондорду жаш ветеринарлар менен камсыз кылып, мамлекеттик ветеринардык кызматтын сапатын жогорулатууга, биокоопсуздукту бекемдөөгө жана айыл аймактары үчүн оң социалдык-экономикалык таасир жаратууга багытталган.Министрлик бул демилгенин социалдык жактан маанилүү жана каржылык жактан туруктуу экенин белгилеп, жарандардын сунуш-пикирлерин кабыл алууга даяр экенин кошумчалайт.
