Эки жылда курултай делегаттарынан түшкөн кайрылуулардын 71%ы аткарылды
Элдик курултайдын катчылыгынын жетекчиси Мыктыбек Абдылдаев делегаттардан канча кайрылуу түшүп жатканын жана алардын кандай аткарылып жатканын айтып берди.
Анын айтымында, 2023–2024-жылдары Элдик курултайдын делегаттарынан келип түшкөн 5 миң 900 кайрылуу каралып чыккан.
"Анын ичинен 3 миң 26 кайрылууну бардык министрликтер, ведомстволор жана жергиликтүү бийлик органдары менен биргеликте иштеп чыгып, аткарылышын 71%га чейин жеткирдик. Бул — жакшы көрсөткүч", — деди ал.
Мыктыбек Абдылдаевдин маалыматына ылайык, өткөн жылдагы курултайдан кийин болжол менен 2,5 миң кайрылуу келип түшкөн. Алардын 500дөн ашыгы Министрлер Кабинетине жана жергиликтүү өз алдынча башкаруу органдарына жөнөтүлүп, көптөгөн делегаттар өз кайрылуулары боюнча жооп алышкан.
Ал ошондой эле бардык кайрылууларды жана сунуштарды болгону алты эксперт иштеп чыгаарын, бул чоң жүк экенин белгилеп, делегаттардан сөздү кыска жана так айтып, негизги маселелерге токтолууну суранды.
