Ири мүйүздүү малдарды жасалма уруктандыруу үчүн жаңы жабдыктар алынды
Суу ресурстары, айыл чарба жана кайра иштетүү өнөр жайы министрлигине караштуу Ветеринария, мал чарбасын өнүктүрүү, жайыт жана тоют кызматы ири мүйүздүү малдарды жасалма уруктандыруу үчүн заманбап жабдык-шаймандар менен камсыз болду.
Жабдык-шаймандарды министрликтин биринчи орун басары Жаныбек Керималиев жеринде текшерип, долбоордун жүрүшү жана жабдыктардын сапаты менен таанышты. Аларды Дүйнөлүк банк каржылаган "Туруктуу агро-азык-түлүк кластерлерин өнүктүрүү" долбоору аркылуу, Агробизнестин атаандаштыкка жөндөмдүүлүк борбору аркылуу сатып алышкан.
Комплекттерде тоңдурулган урукту узак мөөнөткө сактоочу Дьюар идиштери жана башка атайын жабдуулар камтылган. Бул чаралар асыл тукумду өнүктүрүүгө, малдын өндүрүмдүүлүгүн жогорулатууга жана фермерлердин кирешесин көбөйтүүгө багытталган.
