Ноокатта 74 млн сомго жаңы мектеп курулду
Ош облусунун Ноокат районундагы Герейт Шорон жалпы билим берүүчү мектебинин курулушу толук аяктап, окуучулар жаңы имаратта билим ала баштады. 1956-жылы курулган эски мектеп имараты быйыл заманбап талаптарга жооп берген жаңы имаратка алмаштырылды. Бул тууралуу Курулуш, архитектура жана турак жай-коммуналдык чарба министрлигинен билдиришти.
Мектептин курулушу республикалык бюджеттин эсебинен каржыланып, жалпы наркы 74 миллион сомду түздү. Долбоорго ылайык, билим берүү мекемеси 550 окуучуга ылайыкталган.
Жаңы мектеп эки кабаттуу окуу корпусунан жана спорт залынан турат. Ошондой эле окуучулар үчүн лаборатория, китепкана, дарыгердин бөлмөсү, компьютердик класс, балдар жана кыздар үчүн эмгек сабактары өтүлүүчү атайын класстар каралган.
Имараттын жалпы аянты 1705 чарчы метрди түзөт. Жаңы мектеп окуучулардын билим алуусу үчүн бардык шарттар менен камсыздалып, коопсуз жана ыңгайлуу билим берүү чөйрөсүн түзүүгө багытталган.
