Башкы прокуратура "Кылмыштардын бирдиктүү реестри" тутумун талкуулады
Башкы прокуратура Бишкек шаарынын укук коргоо органдарынын катышуусу менен "Кылмыштардын бирдиктүү реестри" автоматташтырылган маалыматтык тутумунун модулдары жана отчёттуулук маселелери боюнча ыкчам кеңешме өткөрдү.
Башкы прокуратуранын маалыматына ылайык, кеңешменин жүрүшүндө электрондук кылмыш иштерин жүргүзүүнүн практикалык аспектилери, материалдарды түзүү тартиби, прокурорго өз убагында жөнөтүлүшү жана маалыматтардын толуктугун камсыз кылуу маселелери талкууланды.
Өзгөчө көңүл тутумда отчёттуулук түзүүгө бурулду. Катышуучулар маалыматтарды туура толтуруу, процессуалдык чечимдерди өз учурунда чагылдыруу жана статистикалык-аналитикалык жыйынтыктарды бирдиктүү ыкма менен даярдоо маселелерин карашты.
Белгиленгендей, отчёттук көрсөткүчтөрдүн тактыгы жана толуктугу укук коргоо органдарынын ишмердүүлүгүн баалоо жана башкаруучулук чечимдерди кабыл алуу үчүн маанилүү.
Башкы прокуратура маалыматтык тутумдун функциясын оптималдаштыруу жана электрондук иштердин сапатын жогорулатуу боюнча иштерди улантууда.
