БШК №13 шайлоо округу боюнча кайра шайлоону каржылоо 18 млн сомдон ашык каражат талап кылат
Бүгүн Борбордук шайлоо комиссиясы (БШК) Жогорку Кеңештин депутаттарын №13 көп мандаттуу шайлоо округу боюнча кайра шайлоону даярдоо жана өткөрүү үчүн чыгымдардын сметасын бекитти.
Мекемеден билдиришкендей, кайра шайлоо 2026-жылдын 1-мартында өткөрүлөт. Каржылоонун жалпы көлөмү 18 миллион 507 миң сомду түзөт. Каражаттар республикалык бюджеттен бөлүнөт.
Бекитилген сметага шайлоо процессин уюштуруу жана маалыматтык камсыздоо, округдук жана участкалык шайлоо комиссияларынын мүчөлөрүнө, ошондой эле тартылган адистерге эмгек акы төлөө чыгымдары киргизилген. Ошондой эле добуш берүү күндөрү тамак-аш үчүн суткалык төлөмдөр, шайлоо комиссиялары үчүн борборлоштурулган сатып алуулар, шайлоо участокторун техникалык жабдуу, маалыматтык материалдарды даярдоо, окутуу иш-чараларын өткөрүү жана кызматтык сапарлар боюнча чыгымдар каралган.
Смета 15 адамдан турган бир округдук шайлоо комиссиясынын жана жалпы саны 965 мүчөнү камтыган 94 участкалык шайлоо комиссиясынын ишин эске алуу менен эсептелген. Алардын ичинде:
- добуштарды автоматтык эсептөөчү урналардын 188 оператору,
- шайлоочуларды идентификациялоо жабдууларынын 188 оператору,
- жарандарды идентификациялоо боюнча техникалык кызмат көрсөтүүчү 55 оператор,
- 24 техникалык колдоо адиси бар.
