ИИМ өлкөдө пиротехника сатуу жана колдонуу боюнча рейд өткөрүүдө
Жаңы жылдык майрамдардын алдында Ички иштер министрлиги (ИИМ) өлкө аймагында жарандардын коопсуздугун камсыздоо жана укук бузуулардын алдын алуу максатында "Пиротехника" рейдин өткөрүүдө. Бул тууралуу ведомстводон билдиришти.
ИИМ кызматкерлери пиротехникалык буюмдарды мыйзамсыз сатууга жана колдонууга катуу көзөмөл жүргүзүүдө. Рейддин негизги максаты – пиротехника колдонулушу менен байланышкан өрттөрдүн, жаракаттардын жана башка өзгөчө кырдаалдардын алдын алуу.
Текшерүүлөр базарларда, соода түйүндөрүндө жана көптөгөн жарандар чогулган жерлерде жүргүзүлүүдө. Пиротехникалык буюмдарды мыйзамсыз сатуу фактылары, ошондой эле сактоо жана сатуунун эрежелерин бузуу аныкталса, дароо бөгөт коюлат.
ИИМ жарандарды пиротехниканы коопсуз колдонууга чакырат: буюмдарды уруксат берилген жерлерден гана сатып алуу, сапат тастыктамалары жана колдонуу нускамаларын текшерүү, ошондой эле мыйзамсыз соодага катышпоого көңүл буруңуздар.
Эске салсак, пиротехникалык буюмдарды мыйзамсыз сатуу жана колдонуу Кыргыз Республикасынын мыйзамдарына ылайык жоопкерчиликке алып келет.
