Бишкек шаарынын мэриясы муктаждарга гуманитардык жардам көрсөттү

Жаңы жылды утурлап, Бишкек шаарынын  мэриясы "Акун" ЖАК менен биргеликте социалдык жактан аялуу тургундарга гуманитардык жардам көрсөттү. Бул тууралуу мэриядан билдиришти.

Шаар мэриясынын жана ага караштуу административдик райондордун жардамы менен гуманитардык жардам борбор калаанын төрт районуна таратылды. Азык-түлүк баштыктары райондук социалдык өнүктүрүү башкармалыктарына жеткирилип, ал жерден ар бир райондогу 75 үй-бүлөгө таратылды. Жалпысынан 300 үй-бүлөгө колдоо көрсөтүлдү.

"Үй-бүлөгө көмөк" мамлекеттик жөлөкпулун алуучуларга, оор турмуштук кырдаалдагы үй-бүлөлөргө, ден соолугунун мүмкүнчүлүктөрү чектелүү адамдарга жана аз камсыз болгон жарандарга жардам көрсөтүлдү.

Ар бир үй-бүлөгө азык-түлүк баштыктары берилди. Анда 5 килограмм ун, 10 килограмм макарон, кесме (китлап) жана пахта майы бар.

Жаңы жылдык колдоо үй-бүлөлөр, айрыкча майрамдарга карата социалдык колдоого муктаж болгондор үчүн маанилүү жардам болду.