Садыр Жапаров: Мектептердин тартыштыгы 12 жылдык билим берүүгө байланыштуу эмес
Өлкөдө мектептердин жетишсиздиги жана класстардагы окуучулардын көптүгү 12 жылдык билим берүү системасына өтүүгө байланыштуу эмес. Бул тууралуу Президент Садыр Жапаров “Кабар” маалымат агенттигине берген маегинде билдирди.
Анын айтымында, айрым мектептерде 40–50 окуучу билим алып жаткан жагдайлар 12 жылдык билим берүү киргизилгенге чейин эле орун алып келген.
"Бул маселе 12 жылдык билим берүү киргизилгенге чейин эле бар болчу. Мисалы, мурда 1–2-класстарга 140–150 миңдей бала кабыл алынса, 2025–2026-окуу жылына карата 1-класс — 106 миң 15, 2-класс — 124 миң 593 окуучуну түздү", — деди мамлекет башчысы.
Президенттин маалыматына ылайык, 2015-жылы өлкөдө 1 миллион 43 миң 356 окуучу болсо, 2025-жылы алардын саны 1 миллион 536 миң 633кө жеткен. Акыркы 10 жылда окуучулардын саны 500 миңге көбөйгөн.
"Бул — мамлекеттеги демографиялык өсүштүн, ошондой эле ички миграциянын агымынын шаарларга көбөйгөнүнүн жыйынтыгы. Айрыкча шаардык борборлордо кошумча мектептерди жана бала бакчаларды куруу зарылдыгы жаралды", — деп белгиледи Садыр Жапаров.
Ал учурда бул багытта пландуу иштер жүргүзүлүп жатканын айтып, 2025-жылдын башынан бери республикалык бюджеттин эсебинен 134 билим берүү мекемеси бүткөрүлгөнүн билдирди. Алардын ичинен 60 мектеп жана 28 бала бакча курулуп, 41 мектепте жана 5 бала бакчада капиталдык оңдоп-түзөө иштери жүргүзүлгөн.
Мындан тышкары, ар кандай каржы булактарынын эсебинен дагы 16 мектеп жана 13 бала бакчанын курулушу аяктаган. Жалпысынан республика боюнча 163 билим берүү объектиси пайдаланууга берилген.
Президенттин айтымында, 2025-жылы Бишкек шаарында 20, Ош шаарында 10, Манас шаарында 6 мектептин курулушу пландалууда. Бул шаарларда мектептерге болгон муктаждык өзгөчө жогору.
Ошондой эле өлкө боюнча учурда ар кандай стадияда курулуп жаткан 216 мектеп жана 107 бала бакча бар. Алардын жарымы 2026-жылы толук бүткөрүлүп, пайдаланууга берилет деп күтүлүүдө.
Садыр Жапаров 12 жылдык билим берүүгө өтүү мезгил талабы экенин да баса белгиледи.
"Бул — бүткүл дүйнөлүк стандарт жана билим берүү рыногунун глобалдык талабы. Биз дүйнөлүк эмгек рыногу менен айкалышкан билим берүү системасынан артта калбашыбыз керек", — деди ал.
Кыргызстанда 2029-жылы 12 жылдык билим берүүнүн алгачкы бүтүрүүчүлөрү мектепти аяктайт. Азыркы 10–11 жылдык система өзүнүн тарыхый миссиясын аткарып бүткөн.
"Бүгүн рынок экономикасына атаандаш боло алган, эрте кесипке ээ болгон адистерди даярдоо — заман талабы. Бул маселеде артта калууга акыбыз жок", — деди мамлекет башчысы.
