Курулуш министрлиги “Алтай” турак жай шаарчасы боюнча түшүндүрмө берди
Социалдык тармактарда Бишкекте курулуп жаткан “Алтай” турак жай шаарчасы боюнча видео тарады. Анда пайдубал үчүн казылган жерлерге суу толуп калганы көрсөтүлүп, коомчулукта тынчсыздануу жараткан.
Бул боюнча Курулуш, архитектура жана турак жай-коммуналдык чарба министрлиги аталган объект боюнча курулуш иштери башталганга чейин инженердик-геологиялык изилдөөлөр жүргүзүлгөнүн билдирди. Анын жыйынтыгында жер астындагы суулардын деңгээли аныкталып, долбоордо тиешелүү инженердик чечимдер каралган.
Долбоорго ылайык, дренаждык система курулат, жер астындагы суулар чыгарылат жана имараттар беш кабаттан ашпайт. Министрлик “Алтай” шаарчасы аз кабаттуу комплекс экенин жана сейсмикалык коопсуздук толук эске алынганын белгиледи.
Ошондой эле министрлик Канат Абдрахматов айткан пикирлерди негизсиз деп атап, жарандарды дүрбөлөңгө алдырбоого чакырды. Аталган аймакта буга чейин да жана азыр да ири объектилер ийгиликтүү курулуп жатканы кошумчаланды.
Министрлик “Алтай” шаарчасынын курулушу толук көзөмөлдө экенин билдирди.
