Стационардык телефон менен мамлекеттик кызматтарга чалуу кымбат болгондуктан уюлдук телефонго өтүү сунушталат
Эмне үчүн мамлекеттик органдарга телефон чалуу мынчалык кымбат? Айрыкча уюлдук телефондордон "Кыргызтелекомдун" стационардык телефондоруна (калкты тейлөө борборуна жана башка кызматтарга) чалуулар жарандарга мүнөтүнө 5-6 сом турат. Айрыкча оператордун жообун көпкө күткөндө олуттуу чыгымга учураган жарандар көптөгөн даттануулар менен кайрылышууда. Мындай пикирин ЖК депутаты Д.Бекешов өзүнун социалдык баракчасында жарыялады.
Эл өкүлүлүнүн айтымында, ал «Кыргызтелекомдун” жетекчиси менен жолугуп, расмий жооп алган. Ага ылайык, кырдаал төмөнкүдөй:
- Байланыш тарифи: Маалымат кызматынын номерлерине чалуулар үчүн тариф 2,50 сом. Калган бааны мобилдик операторлор белгилешет.
- Жогорку чыгымдар: Компаниянын билдирүүсү боюнча байланыштын бир мүнөтүнүн өз баасы 9,78 сомго барабар. Бул тариф өлкө боюнча инфраструктураны тейлөө жана кызматкерлердин айлык акысын төлөө зарылдыгы менен түшүндүрүлөт.
- Күтүүлөр: “Кыргызтелеком” бааларды 2027-жылы, SIP-технологияга өткөндөн кийин гана төмөндөтүүнү пландаштырууда.
Бирок, Дастан Бекешов, дагы бир-эки жыл күтүп, жарандардын мамлекеттик кызматтарга жетүү үчүн ашыкча төлөм кетиришин каалабастыгын билдирди:
“Менин чечимим: "Кыргызтелеком" азыр тарифтерди төмөндөтө албагандыктан, мен мамлекеттик жана жергиликтүү өз алдынча башкаруу органдарына коомдук байланыш үчүн уюлдук телефон номерлерине жапырт өтүүнү сунуштайм.” - дейт Бекешов
Анын баамында, уюлдук телефон аркылуу байланышууда жарандар “күтүү кезектерине” акча коротпостон, өз тармактарынын ичинде же пакеттелген тарифтер менен мамлекеттик органдарга акысыз чалуу мүмкүнчүлүгүн алышат.
