Ош аэропортунда 1 млн сомдук алтын буюмдар өлкөгө киргизилген жок
Мамлекеттик салык кызматынын кызматкерлери ЕАЭБге мүчө өлкөлөрдөн алтын зер буюмдарын мыйзамсыз алып кирүү аракетин токтотушту. Бул тууралуу мекеменин басма сөз кызматы билдирди.
Маалыматка ылайык, мыйзам бузуу фактысы Ош эл аралык аэропортунда аныкталган.
Такталган маалымат боюнча, өлкөгө жалпы баасы 1 млн сомдон ашкан алтын буюмдар — шакек, сөйкө жана чынжырлар коштоочу документтерсиз алып кирилүүгө аракет жасалган.
Бул факты боюнча тиешелүү актылар түзүлдү. Текшерүүнүн материалдары укуктук баа берүү үчүн прокуратура органдарына жөнөтүлдү.
Мамлекеттик салык кызматы Кыргызстан аймагына зер буюмдарды алып кирүүгө көзөмөл уланып жатканын белгиледи.
