Президент мамлекеттик "Кыргыз Туусу" жаңы басма үйүн түзүү жарлыгына кол койду
Президент Садыр Жапаров мамлекеттик "Кыргыз Туусу" аттуу жаңы басма үйүн түзүү тууралуу Жарлыкка кол койду. Документ мамлекеттик маалыматтык саясатты өнүктүрүүгө, полиграфиялык базаны чыңдоого, мамлекеттик ЖМКлардын ишин туруктуу кылууга жана бюджеттик чыгымдарды оптималдаштырууга багытталган.
Жарлыкка ылайык, бир катар мамлекеттик медиа жана басма түзүмдөрү бириктирилет. Алардын негизинде мамлекеттик "Кыргыз Туусу" басма үйү түзүлөт. "Жеткинчек" гезитинин жана "Кырчын" журналынын редакциялары жоюлат.
Министрлер Кабинетине жаңы мекеменин жобосун, штаттык түзүмүн жана бюджетин бекитүү тапшырылды. Жарлык расмий жарыяланган күндөн тартып күчүнө кирет.
