ЕАЭБ талаптарына жооп бербеген 11,7 тонна колбаса азыктары артка кайтарылды
Чүй облусуна караштуу "Ак-Тилек чек ара ветеринардык көзөмөл өткөрүү жайында Россиядан Кыргызстанга мыйзамсыз ташылып келе жаткан 11 720 кг колбаса азыктары аныкталды. Бул тууралуу Суу ресурстары, айыл чарба жана кайра иштетүү министрлигинен билдиришти.
Текшерүү чек ара ветеринардык көзөмөл пунктунун инспекторлору тарабынан жүргүзүлүп, анын жыйынтыгында Евразия экономикалык биримдигинин ветеринардык-санитардык талаптары сакталбагандыгы белгилүү болду.
Аталган факт боюнча тиешелүү тартипте актылар түзүлүп, жүктү Кыргызстандын аймагына киргизүүгө тыюу салынды. Натыйжада колбаса азыктары "Ак-Тилек" көзөмөл өткөрүү жайы аркылуу кайрадан Россия Федерациясына жөнөтүлдү.
Тиешелүү кызматтар ветеринардык-санитардык талаптарды сактоо жарандардын саламаттыгын коргоодо маанилүү экенин эскертет.
