Кыргызстанда сууну башкаруунун жаңы санариптик системасы ишке кирди

Суу ресурстары, айыл чарба жана кайра иштетүү өнөр жайы министрлигине караштуу Суу ресурстары кызматы "Суунун бирдиктүү маалыматтык системасын" (АИС ЕИСВ) иштеп чыгып, ирригация тармагындагы суу ресурстарын башкарууну санариптештирди. Бул тууралуу ведомстводон билдиришти.

Жаңы система сууну пландаштырууга, эсепке алууга жана мониторинг жүргүзүүгө мүмкүндүк берип, суу ресурстарын пайдалануунун ачыктыгын камсыз кылат. АИС ЕИСВ ирригациялык объектилер, суу пайдалануучулар жана суу чарба курулмалары боюнча маалыматтарды бирдиктүү санариптик мейкиндикте топтойт.

Система ГИС технологиялары менен интеграцияланган, мейкиндиктик маалыматтарды жана айыл чарба өсүмдүктөрүн эске алуу менен талдоо жүргүзүүгө мүмкүнчүлүк берет.

АИС ЕИСВди Кыргызстан боюнча толук масштабда 2026-жылдын башына колдонууга киргизүү пландалууда. Кийинчерээк система модернизацияланып, функционалдык мүмкүнчүлүктөрү кеңейип, ведомствонун кызматтары автоматташтырылат жана суу пайдалануучулар үчүн санариптик сервистер ишке киргизилет.