Курулуш министрлиги адистерди жумушка чакырат – айлыгы 150-500 миң сом
Курулуш, архитектура жана турак жай-коммуналдык чарба министрлиги сыйлуу адистерди ишке чакырууда. Бул тууралуу министр Нурдан Орунтаев социалдык баракчасында билдирди.
Министрликтеги департаменттер өзүн-өзү камсыздоо механизми менен иштеп, орточо айлык 150 миң сомду түзөт, ал эми кээ бир департаменттерде 500 миң сомго чейин жетет. Айлык адистин билими, жоопкерчилиги жана иштөө натыйжасына жараша белгиленет.
Министрдин айтымында, көпчүлүк кызматкерлер архитектор, куруучу, конструктор жана инженерлер болуп, көп кабаттуу жана татаал объектилердин курулушуна жооптуу. Алар долбоорлорду жана керектүү документтерди текшерип, объекттердин коопсуздугун камсыздашат. Мына ушундай жооптуу эмгеги үчүн айлык маянасы жогору белгиленет.
“Тийиштүү билими бар жана иштөөгө даяр жарандар үчүн эшигибиз ар дайым ачык. Тиешелүү профилдеги адистер министрликке келип иштесин”, — деп кошумчалады министр.
