7 млн сомду ыйгарып алуу боюнча чет өлкөлүк жаран кармалды
Чүй облусунда өзгөчө ири өлчөмдө акча каражаттарын ыйгарып алуу жана коротууга шектелген чет өлкөлүк жаран кармалганын облустук Ички иштер башкы башкармалыгынын басма сөз кызматы билдирди.
Ведомствонун маалыматына ылайык, 5-январда милицияга "Ингосстрах" ЖАКынын башкармалыгынын өкүлү Ы.Н. арыз менен кайрылган.
Арызда айтылгандай, 2025-жылдын апрелинен декабрына чейинки аралыкта жеке ишкер Д.А.Р.ге тиешелүү айрым кызматкерлер ОСАГО камсыздандыруу полистерин сатуу учурунда 7 млн 85 миң 708 сом акча каражатын ыйгарып алып, коротуп жиберишкенден кийин изин жашырып кетишкен.
Бул факты боюнча Кылмыш-жаза кодексинин "Ишенилип берилген мүлктү ыйгарып алуу же коротуу" беренеси менен кылмыш иши козголду.
Ыкчам-издөө иш-чараларынын жүрүшүндө милиция кызматкерлери шектүүнүн өздүгүн аныкташкан. Ал 1985-жылы туулган, А.А. аттуу чет өлкөлүк жаран болуп чыккан. Ал кармалып, убактылуу кармоочу жайга камалды.
Учурда кылмыш иши боюнча тергөө амалдары улантылып жатат. Укук коргоо органдары болгон окуянын бардык жагдайларын, ошондой эле мүмкүн болгон башка шериктерин аныктоодо.
