Бишкекте 26-апрелде ишкерлер, бизнес-командалар, компания жетекчилери үчүн корпоративдик чуркоо уюштурулат
Бишкек шаарында 26-апрелде "Адинай" паркында Business Run 2026 аттуу ири корпоративдик чуркоо мелдеши өтөт. Иш-чараны Соода-өнөр жай палатасы уюштуруп жатат.
Business Run 2026 ишкерлерди, компания жетекчилерин жана өлкөнүн ар тарабынан келген бизнес-командаларды бириктирген масштабдуу иш-чара катары пландалууда. Ал бейформал шартта баарлашуу жана нетворкинг үчүн аянтча болуп кызмат кылат.
Ар бир компания беш адамдан турган команда түзөт. Катышуучулар бирге белгиленген аралыкты чуркап өтүп, энергиясын, биримдигин жана жаңы мүмкүнчүлүктөргө умтулуусун көрсөтүшөт. Уюштуруучулар бул формат заманбап корпоративдик маданиятты чагылдырарын, анда сергек жашоо образы жана жамааттын ынтымагы бааланарын белгилешет.
Жеңүүчүлөр үчүн атайын сыйлыктар даярдалган, бирок алардын чоо-жайы азырынча ачыкталган жок. Иш-чарага экономиканын ар түрдүү тармактарынын өкүлдөрү, ошондой эле өнөктөштөр жана бизнес-ассоциациялар катышары күтүлүүдө.
Чуркоо 26-апрелде "Адинай" паркында өтөт. Корпоративдик командалар үчүн каттоо буга чейин эле башталган. Уюштуруучулар белгилегендей, Business Run 2026 — бул кеңседен чыгып, күчтүү команда жумуш процессинде гана эмес, спорттук аянтчада да жеңишке жете аларын көрсөтүүгө мүмкүнчүлүк.
