Бишкекте көрктөндүрүү жана тазалоо боюнча эки айлык ишембилик жарыяланды
Бишкек шаарынын мэриясынын буйругу менен шаар аймагында көрктөндүрүү, санитардык тазалоо жана жашылдандыруу боюнча эки айлык ишембилик жарыяланды. Бул тууралуу муниципалитеттен билдиришти.
Иш-чара шаар инфраструктурасын жакшыртуу, санитардык абалды чыңдоо жана борбор калаанын аймагын көрктөндүрүү максатында өткөрүлөт.
Ага ылайык, 14-марттан 16-майга чейин борбор калаада аймактарды тартипке келтирүү, экологиялык абалды жакшыртуу жана шаар тургундары менен коноктору үчүн ыңгайлуу шаардык чөйрөнү түзүүгө багытталган иш-чаралар жүргүзүлөт.
Эки айлыктын алкагында көчөлөрдү, парктарды, скверлерди жана короолорду санитардык тазалоо, бак-дарактарды жана бадалдарды отургузуу, коомдук жайларды көрктөндүрүү, ошондой эле ишканалардын, уюмдардын жана мекемелердин айланасындагы аймактарды тартипке келтирүү иштери жүргүзүлөт.
Мындан тышкары, ишембиликке менчиктин бардык түрүндөгү ишканалар, уюмдар жана мекемелер тартылат. Административдик райондордун башчыларына муниципалдык аймактык башкармалыктар менен биргеликте тазалоо жана жашылдандыруу иштерин уюштуруу жана координациялоо тапшырмасы берилди.
Ошондой эле объект ээлери, турак жай менчик ээлеринин шериктештиктери жана шаар тургундары өздөрүнө бекитилген жана чектеш аймактарды тазалоо иштерине активдүү катышууга тийиш.
Бишкек шаарынын мэриясы шаар тургундарын борбор калааны көрктөндүрүү жана жашылдандыруу боюнча эки айлык ишембиликке активдүү катышууга чакырат.
