Ош мэри Улуу Британия менен жаңы инфраструктуралык долбоорду талкуулады
Ош шаарынын мэри Жанарбек Акаев Улуу Британиянын Кыргыз Республикасындагы Элчиси Николас Боулер менен жолугушту. Бул тууралуу муниципалитеттен билдиришти.
Жолугушууда эки тараптуу кызматташтыкты өнүктүрүү, билим берүү, спорт, шаардык инфраструктураны жакшыртуу жана инвестициялык мүмкүнчүлүктөрдү кеңейтүү маселелери талкууланды.
Калаа башчысы Улуу Британиянын экспорттук-финансы агенттиги UKEF (UK Export Finance) менен өз ара пайдалуу кызматташтыкты өнүктүрүүгө кызыкдар экендигин билдирди. Ал агенттиктин каржылык колдоосу аркылуу шаарды айланып өтүүчү заманбап айланма жолду куруу сунушун айтты.
Мэрдин айтымында, бул долбоор шаар ичиндеги транспорт агымын жөнгө салууга, жол тыгындарын азайтууга жана транзиттик унаалардын кыймылын шаар сыртына багыттоого мүмкүндүк берет. Мындан тышкары, жол коопсуздугун жогорулатууга да өбөлгө түзөрү белгиленди.
Жолугушуунун жыйынтыгында тараптар Ош шаары менен Улуу Британиянын ортосундагы кызматташтыкты мындан ары да чыңдоого, ошондой эле экономикалык, инвестициялык жана инфраструктуралык багыттар боюнча биргелешкен долбоорлорду ишке ашыруу мүмкүнчүлүктөрүн кароого кызыкдар экендиктерин билдиришти.
