Пакистан, Бангладеш жарандарына жасалма №86 формасын жасап бергендер кармалды
Бишкекте мыйзамсыз миграция каналы аныкталып, уюштуруучулар колго түшүрүлгөнүн УКМКдан билдиришти. Атайын кызматтан билдиришкендей, ыкчам-издөө иш-чараларынын алкагында Пакистандын жараны А.М. жана ага көмөктөшкөн Улуттук госпиталдын кызматкери И.Т.В. кармалды.
Кылмышка шектүүлөр чет өлкөлүк жарандарга (Пакистан, Бангладеш) медициналык кароодон өткөрбөстөн, виза мөөнөтүн узартуу үчүн колдонулуучу №086 формасындагы жасалма маалымкаттарды сатып келишкен. Алардын жашаган жана иштеген жерлерин тинтүү учурунда виза тариздөөгө даярдалган 160тан ашык жасалма медициналык маалымкат табылды.
УКМК белгилегендей, Түштүк Азия өлкөлөрүндө өлүм көрсөткүчү жогору болгон "Нипах" вирусу жайылып жаткан шартта чет элдиктердин медициналык текшерүүсүз өлкөдө жүрүүсү санитардык-эпидемиологиялык абалга түздөн-түз коркунуч жаратат.
Учурда бул кылмышка тиешеси бар башка тараптарды аныктоо боюнча иштер уланууда. УКМК чет элдик жарандарды Кыргызстандын мыйзамдарын так сактоого чакырат.
