Кыргызстанда былтыр 1 миң 359 кызматтык жана коррупциялык кылмыштар козголду
2025-жылы укук коргоо органдары кызматтык жана коррупциялык кылмыштар боюнча 1 миң 359 кылмыш ишин козгогонун Жогорку Кеңештин сот-укук маселелери, укуктук тартип, кылмыштуулукка каршы күрөш жана коррупцияга каршы комитетинин жыйынында башкы прокурор Максат Асаналиев билдирген.
Анын айтымында, бул категориядагы иштер боюнча (мурдагы жылдарды кошкондо) 1 миң 710 иштин тергөөсү аяктап, алардын ичинен:
- 1 миң 330 иш сотко жиберилген;
- 380 иш токтотулган.
Өткөн жылы коррупцияга каршы мыйзамдарды бузуу боюнча 7 миң 816 учур аныкталып, 4 миң 949 прокурордук реакция актылары ишке киргизилген.
Анын натыйжасында:
- 1 миң 304 кызматкер дисциплинардык жоопкерчиликке тартылган;
- 2 миң 930 кызмат адам административдик жоопкерчиликке тартылып, айып пул салынган;
- мамлекетке жалпы 6 миллиард 460 миллион сом өлчөмүндө чыгым жабылган.
Башкы прокурор белгилегендей, 2024-жылы 2025–2030-жылдарга коррупцияга каршы мамлекеттик стратегия бекитилип, Башкы прокуратура коррупцияны алдын алуу боюнча ыйгарым укуктуу орган деп белгиленген.
Анын айтымында, 2025-жылы коррупцияны алдын алуу системалары жана институттарын түзүү боюнча даярдык иштер жүргүзүлгөн, анын натыйжалары быйылдан баштап көрүнө баштайт.
