Брюссель соту "Бакай Банкка" коюлган айыптоолорду негизсиз деп тапты
Кыргызстандык банктын күмөндүү операцияларга тиешеси бар деген айыптоолор негизсиз деп табылды. Мындай чечимди жакында Брюссель шаарындагы сот кабыл алганбыгын КРнын Президентинин басма сөз катчысы Аскат Алагөзов жеке баракчасында билдирди.
Анын айтымында, 2023-жылы «Ачык диалог фонду» (ODF) өз сайтында жарыялаган макалаларында «Бакай Банкты» Россияга карата санкцияларды айланып өтүүгө катышкан деп айыптап, ага санкция киргизүүнү сунуштаган. Буга байланыштуу банк уюмду сотко берип, жыйынтыгында соттун чечими банктын пайдасына чыгарылган.
Ошол эле учурда Кыргызстандагы айрым банктарга карата эл аралык санкциялар дагы деле талкуу жаратууда. Маселен, «Керемет Банк» АКШ жана Улуу Британия тарабынан, ал эми «Капитал Банк» Улуу Британия тарабынан санкциялык тизмеге киргизилген. Бирок бул санкциялар азырынча шектенүүгө гана негизделип, так далилдер ачык жарыялана элек.
Президент Садыр Жапаров буга чейин мындай айыптоолорду бир нече жолу четке кагып, алар айрым бейөкмөт уюмдардын жана кызыкдар тараптардын негизсиз маалыматтарына таянарын белгилеген. Ошондой эле Кыргызстан банктарга карата бардык шектенүүлөрдү текшерүү үчүн эл аралык көз карандысыз аудит өткөрүүгө даяр экенин билдирген.
