Парламентте лабораториялык анализдердин бирдиктүү баасын түзүү маселеси көтөрүлдү
Бүгүн Жогорку Кеңештин жыйынында депутат Венера Салямова лабораториялык анализдер жана алардын баасы боюнча маселелерди көтөрдү.
Анын айтымында, дарыгерлерге онлайн жазылуу системасы жарандар үчүн ыңгайлуу шарттарды түздү. Бирок бейтаптарды кабыл алуу учурунда лабораториялык анализдерди негизсиз түрдө кайра-кайра тапшырууну дайындоо практикасы кездешүүдө.
Ошондой эле ал жеке жана мамлекеттик лабораторияларда анализдердин баасы ар башка экенин белгилеп, бул жарандар үчүн кошумча каржылык жүк жаратып жатканын айтты.
Венера Салямова профилдик министрлик менен биргеликте төмөнкү маселелерди карап чыгууну сунуштады:
- негизсиз кайра анализ дайындоону жөнгө салуу;
- лабораториялык кызматтардын баа саясатын тартипке келтирүү;
- өлкө боюнча лабораториялык изилдөөлөрдүн бирдиктүү жана жеткиликтүү баа түзүү механизмин иштеп чыгуу.
