Россияда рейддерден кийин 6 миңдей мигрант сыртка чыгарылат
Россияда март айында мыйзамсыз миграцияга каршы жүргүзүлгөн рейддердин жыйынтыгында өлкөдөн болжол менен 6 миң чет элдик жаранды чыгаруу чечими кабыл алынганганын Россия Ички иштер министрлигинин расмий өкүлү Ирина Волк өзүнүн Telegram-каналында билдирген.
Мындан тышкары, текшерүүлөрдүн жыйынтыгында дээрлик миңге жакын кылмыш иши козголгон. Рейддер учурунда 138 издөөдө жүргөн адам аныкталган. Дагы 7,7 миң чет элдик жаранга Россияга кирүүгө тыюу салуу чечими кабыл алынган.
Ошондой эле 48 миң административдик укук бузуу катталган. Жоопкерчиликке 26 миңден ашык мигрант тартылган, алардын 24 миңи милдеттүү дактилоскопия жана сүрөткө тартуу процедурасынан өткөн.
Волктун айтымында, март айындагы рейддер өлкө боюнча өткөрүлүп, иш-чараларга ИИМ жана Федералдык коопсуздук кызматынын өкүлдөрү катышып, ал эми күч органдары тарабынан Россиянын Улуттук гвардия аскерлеринин федералдык кызматы (РФУГАФК) колдоо көрсөткөн.
Бул жолу өзгөчө көңүл транспорттук инфраструктура объекттерин текшерүүгө бурулган. Ошондой эле рейддер базарларды, кампаларды, өндүрүш аймактарын жана чет элдик жарандар жашаган жерлерди да камтыган. Жалпысынан укук коргоо органдары 130 миңден ашык объектти текшеришкен.
Рейддерге болжол менен 60 миң полиция кызматкери тартылган. Натыйжалуулукту жогорулатуу үчүн учкучсуз учуучу аппараттар жана башка заманбап техникалык каражаттар колдонулган.
Белгиленгендей, ИИМдин маалыматына ылайык, 2025-жылы Россиядан 72 миң чет элдик жаран чыгарылган.
Мындан улам бул сан дагы өсүшү мүмкүн, себеби Мамлекеттик Думанын депутаттары депортацияга негиз болгон себептердин тизмесин 22ден 43кө чейин кеңейтүүнү пландаштырууда.
Атап айтканда, чыгаруу себептерине коомдук тартипти бузуу, полиция же РФУГАФК талаптарына баш ийбөө, инфраструктура жана транспорттун ишине тоскоолдук кылуу сыяктуу учурлар киргизилиши мүмкүн.
Ошондой эле интернетте “коомдук адеп-ахлакты кемсинткен” материалдарды таратуу жана Россия армиясын “каралоо” же РФга каршы санкция киргизүүгө чакырык жасоо сыяктуу аракеттер да тизмеге кошулушу мүмкүн.
