Мамлекеттик ооруканаларда дарыгерлердин саны жылдан жылга азайып бара жатат
Кыргызстанда жумуштан кеткен медицина кызматкерлеринин саны жыл сайын өсүп жатканы бүгүн саламаттык сактоо тармагындагы эмгек рыногун талдоо боюнча презентацияда айтылды.
Адистердин маалыматы боюнча, 2022-жылы саламаттык сактоо уюмдарынан болжол менен 1,5 миң дарыгер кеткен (анын ичинде 70и өлкөдөн тышкары). 2023-жылы жумуштан кеткен дарыгерлердин саны 2,1 миңге жеткен (анын ичинде 58и чет өлкөгө кеткен). Ал эми 2024-жылы жумуштан кеткен дарыгерлердин саны 2,4 миңден ашкан.
Акыркы үч жылда мамлекеттик медициналык мекемелерден кеткен медайымдардын, акушерлердин жана фельдшерлердин саны да өсүүдө.
Буга чейин республика боюнча 6 миң 338 дарыгер жана 7 миң 880 орто медициналык кызматкер жетишсиз экени айтылган. Айрыкча үй-бүлөлүк дарыгерлерге, терапевттерге, педиатрларга, анестезиолог-реаниматологдорго жана акушер-гинекологдорго муктаждык жогору. Кадрлардын жетишсиздигинин негизги себептери — мамлекеттик ооруканалардагы айлык маянанын төмөндүгү жана жүктөмдүн көптүгү.
