Бишкек мэри Фучик көчөсүндөгү жайма базардагы соодагерлерге эскертүү берди
Бишкек шаарынын мэри бүгүн ордо калаанын Фучик көчөсүндөгү жайма базардагы жагдай менен жеринен таанышып келди. Айбек Жунушалиев базарды кыдырып, андагы баш аламан соодага назарын бөлүп, соодагерлер менен баарлашты.
Жайма базарга баруунун жүрүшүндө шаар башчы, базарда соода кылгандарга соода жүргүзүүдө эрежелерди так сактап, жашыл аймакты тебелейбей, эл басуучу жолду жаппай, тартипти бузбай иштөөгө чакырды.
Аталган аймактын айрым тургундары буга чейин бул жайма базардын ишине нааразылыктарын билдирип, санитардык абал начар экенин, коопсуздук маселелери бар экенин айтып келишкендиги маалым болду. Ошондуктан, Айбек Жунушалиев соодагерлерге эскертүү берип, тийиштүү эрежелер сакталбай турган болсо, базарды жабууга туура келээрин эскертти.
Мэриянын басма сөз кызматы билдиргендей, жайма базарды жабуу маселеси жаңы Ош базарынын аймагында соодагерлер үчүн альтернативдүү орундар толук камсыздалгандан кийин каралышы мүмкүн.
