Мыйзам талаптарына туура келбеген жарнама такталар алынды

Бишкекте жер пайдаланууну контролдоо башкармалыгы тиешелүү кызматтар менен биргеликте рейд өткөрдү. Бул тууралуу Бишкек шаарынын мэриясынын басма сөз кызматы билдирди.

Маалыматка таянсак, "Кыргыз Республикасынын мамлекеттик тили жөнүндө" мыйзамын аткаруу максатында, 25-26-апрелде Бишкектин райондорунда тышкы жарнамаларды, аталыштарды жана башка визуалдык маалымат такталарды жөнгө салуу боюнча рейддер өткөрүлүүдө.

Рейддин алкагында мамлекеттик тил мыйзамдарына жана бекитилген дизайн-кодко жооп бербеген жарнамалык белгилерди жана маалымат конструкцияларын аныктоо жана алып салуу иштери жүргүзүлдү. Ошондой эле аныкталган мыйзам бузууларды оңдоо боюнча чаралар көрүлдү.

Натыйжада, Свердлов районундагы төмөнкү жерлердеги белгилер алынып салынды:

1. “Ред Сан” кафеси - Сүйүмбаев көчөсү, 14;

2. “МР Хого” кафеси - Сүйүмбаев көчөсү, 41;

3. “Лулан” кафеси — Москва көчөсү, 15;

4. “Сфера” кафеси — Чуй проспектиси, 117;

5. “1919” кафеси — Осмонкул көчөсү, 123/1;

6. “Хого” дүкөнү — Курманжан Датка көчөсү, 91.

Биринчи Май районунда: беш кафенин белгилерин кошо алганда, 17 жарнамалык конструкция демонтаждалган. Мындан тышкары, эскертүүлөр берилип, латын тамгалары менен жазылган 10 ишканага түшүндүрүү иштери жүргүзүлдү.

Ошондой эле Байтик Баатыр көчөсү, 19 дарегине Кыргыз Республикасынын "Укук бузуулар жөнүндө" кодексинин 107-беренесинин 3-бөлүгү боюнча протокол түзүлгөн.

Текшерүүлөр төмөнкү жерлерде жүргүзүлдү: “Ариран”, “Людмила”, “Хого1”, “Хого2”, “Девелопмент Дом Бишкек”  ЖЧКсы, “Балык по гунфу” жана башка жерлерде. Октябрь районундагы жалпысынан 23 мүлк текшерүүлөргө киргизилген.

Ленин районунда комиссия менен биргеликте кафе жана ресторандарына текшерүү жүргүзүлдү. Текшерүүнүн жыйынтыгында мекеме ээлерине менюларды (тамак аш тизмесин) белгиленген талаптарга ылайык келтирүү, ошондой эле кытай тилинде жазылган аталыштарды өзгөртүү боюнча эскертүүлөр берилди.