Бишкекте электр тармактар ишканасында коррупциялык схема аныкталды
Бишкек электр тармактар ишканасында коррупциялык схема аныкталып, ага бөгөт коюлду. Бул тууралуу Ички иштер министрлигинин Басма сөз кызматы билдирди.
Тергөөнүн маалыматына ылайык, 2023-жылдан 2026-жылдын март айына чейин ишкананын жетекчилиги жана бухгалтерия кызматкерлери алдын ала сүйлөшүп алып, мамлекеттик каражаттарды мыйзамсыз чыгарып кетүү боюнча туруктуу схеманы уюштурушкан.
Аталган схемага ылайык, жасалма ведомосттор түзүлүп, акча каражаттары айлык акы катары көрсөтүлүп, үчүнчү жактын банктык эсебине которулган. Андан соң акчалар накталай чыгарылып, катышуучулар арасында бөлүштүрүлгөн. Натыйжада мамлекеттик ишканага өзгөчө ири өлчөмдө зыян келтирилгени айтылды.
Бул факты боюнча Кылмыш-жаза кодексинин 337-беренеси (“Кызмат абалынан кыянаттык менен пайдалануу”) менен кылмыш иши козголду.
Ыкчам-тергөө иш-чараларынын жүрүшүндө 1969-жылы туулган А.М., 1972-жылы туулган Ч.И. жана 1980-жылы туулган Д.Ш. кармалды. Алар 2 айга камакка алынды. Учурда тергөө иштери уланууда.
