Бишкекте муниципалдык кызматтарга жаңы техника тапшырылды
Бүгүн Бишкек шаарынын күнүн белгилөөнүн алкагында мэриянын алдында муниципалдык түзүмдөргө жаңы кызматтык техникаларды тапшыруу аземи өттү. Бул тууралуу муниципалитеттен билдиришти.
Муниципалитеттин маалыматына ылайык, иш-чарада шаар мэри Айбек Джунушалиев 11 даана Chevrolet Cobalt үлгүсүндөгү кызматтык автоунаанын ачкычтарын тапшырып, ошондой эле шаардык кызматтардын мобилдүүлүгүн жогорулатуу максатында 10 заманбап электровелосипедди берди.
Мэр борбор калаанын тургундарын майрам менен куттуктап, шаардык кызматтардын сапаттуу жана ыкчам иштөөсүн камсыз кылуу үчүн материалдык-техникалык базаны жаңылоонун маанилүүлүгүн белгиледи.
Жаңы автоунаалар бир катар шаардык департаменттерге жана муниципалдык ишканаларга бөлүштүрүлдү. Ал эми электровелосипеддер муниципалдык инспекциянын ишин чыңдоого багытталды.
Мындан тышкары, борбор калаада фонтан сезону ачылып, реконструкциядан өткөн мэриянын алдындагы фонтан кайра ишке кирди.
Берилген техникалар шаардык кызмат көрсөтүүлөрдүн сапатын жогорулатууга, иштин ыкчамдуулугун арттырууга жана шаар инфраструктурасын өнүктүрүүгө багытталган.
